Me ricordo i primi passi, quando che cèo ndavo conosare el mondo. A ojessa alta squasi fin el stomego drio el rajo de bacò. Tute e robe gera grande, e vigne, i moràri, parfìn i ràvi i gera pi grandi de mi.
Lòra, pai campi, ghe gera el siensìo, l’odore dea tera, dee piante, l’odore dell’aria. In fondo al campo na riva de pratàni, onàri e gadìe, de russe, de ciuci: a riva dee paure, a riva dell’orco, dee strighe, a riva del domàn.
Me ricordo deso, come fusse giri, e me fantasìe, e me voje, e me paùre. A me voja de conossare el mondo, el mondo deà riva, ma conossare ga on presso, i ani, xe el presso….
Coi ani, te ghe el conossare, te vinsi e paùre da toseto, ma, te cati quee da grando, te vidi l’orizonte deà dea riva, te serchi in tee fantasie da grando sogni impossibili, da no contarghe a nissuni, ma, all’orizonte altre rive, altro presso da pagàre.
Te te cati, coe rughe so a fronte, co e man fiape, poxae so on selgàro, ma no par conossare, no par tastàre, poxà so on selgàro, parchè stufo de caminare.
In fondo, proprio drento de ti, chea maincònia, chea paura dea caressa freda che te porta via i to sogni,el to orizonte, che te porta via anca a riva, a riva dee paure.
Zaniolo Roberto ( da Villa del Conte ) ha partecipato al Concorso il ” MURAZZO “ con la poesia ”A riva dee paùre “ La poesia xe sta segnaeà e premià so oltre settesento poeti dialettai ieri 29 de Majo 2010